Senda inn ágrip

Menntakvika, árleg ráðstefna í menntavísindum, verður haldin miðvikudag og fimmtudag, 30. september og 1. október 2026, í 30. skiptið. Ráðstefnan verður haldin í Sögu – húsnæði Menntavísindasviðs Háskóla Íslands.

Markmið ráðstefnunnar Menntakviku er að kynna og miðla því sem efst er á baugi í menntavísindum og tengdum sviðum hverju sinni. Menntavísindasvið býður öllum sem stunda rannsóknir í menntavísindum og tengdum fagsviðum til þátttöku á ráðstefnunni, sem og öllu starfsfólki annarra stofnana sem rannsaka eða vinna með viðeigandi málefni. 

Hægt verður að fylgjast með málstofunum á Zoom, málstofurnar verða ekki teknar upp.

Ráðstefnan er öllum opin og ókeypis.

Dagskrá Menntakviku 2026 mun samanstanda af hefðbundnum ráðstefnuerindum og vinnusmiðjum og verður lögð áhersla á að raða erindum í dagskrá þannig að sem flest geti tekið þátt. Aðalerindi ráðstefnunnar verða eftir hádegi á miðvikudeginum.

Hér með er kallað eftir ágripum fyrir fjölbreytt innlegg á Menntakviku.

– Vinsamlegast lesið leiðbeiningarnar hér að neðan vel áður lengra er haldið –

  • Hámarkslengd ágripa er 250 orð. 
  • Ágrip eiga ekki að innihalda heimildir.
  • Aðeins er leyfilegt að vera fyrsti höfundur að einu erindi, en meðhöfundur að tveimur. Hver þátttakandi getur því aðeins haldið eitt erindi á ráðstefnunni. Þetta gildir um einstaklingserindi, málstofur og veggspjöld, en ekki um skapandi smiðjur og kynningar.
  • Grunnnemum á háskólastigi er ekki heimilt að flytja erindi á ráðstefnunni (B.ED, BS, BA).
  • Ágrip eiga að vera prófarkalesin áður en þeim er skilað inn.
  • Ekki verður hægt að skila ágripum inn með öðrum hætti en í gegnum skráningarform Menntakviku.
  • Leiðbeinendur þurfa ekki alltaf að vera skráðir sem meðhöfundar erinda/veggspjalda sem byggja á meistaraverkefnum, en þeir skulu alltaf tilgreindir sem leiðbeinendur.

Rannsakendur, fagfólk, og sérfræðingar á sviði menntavísinda geta sent inn erindi. Erindið verður síðan flokkað með öðrum svipuðum erindum í málstofur.

Öll innsend ágrip fyrir einstaklingserindi þurfa að innihalda:

  • stutta lýsingu á tilgangi og markmiðum rannsóknar  
  • stutta lýsingu á aðferðum  
  • helstu niðurstöður og ályktanir af þeim auk lærdóms sem draga má af verkefninu.  
  • Ekki skal vísa í heimildir í ágripi.

Fyrirfram ákveðin málstofa með 3-5 erindum þar sem hópur fræðimanna eða sérfræðinga á vettvangi kemur saman með það markmið að fjalla um afmarkað efni eða rannsóknarsvið. 

Öll innsend ágrip fyrir skipulagðar málstofur þurfa að innihalda:

  • stutta lýsingu á tilgangi og markmiðum rannsóknar  
  • stutta lýsingu á aðferðum  
  • helstu niðurstöður og ályktanir af þeim auk lærdóms sem draga má af verkefninu.  
  • Ekki skal vísa í heimildir í ágripi.

Kynning á þróunarverkefnum þar sem gestir ráðstefnunnar fá tækifæri til að taka þátt, prófa nýjungar og fá innsýn í fjölbreytt verkefni á vegum Menntavísindasviðs og vettvangs. Ert þú að vinna að áhugaverðu verkefni sem jafnvel tengist vettvangi? Ertu með nýstárlegar aðferðir eða búnað sem væri gagnlegt fyrir fagaðila að prófa eða fá innsýn í?

Öll innsend ágrip fyrir kynningar/smiðjur þurfa að innihalda:

  • Upplýsingar um ábyrgðaraðila vinnusmiðju.
  • Titil kynningar/smiðju.
  • Lýsingu á kynningu/smiðju.
  • Upplýsingar um búnað/aðstöðu, s.s. tölvur, rafmagn. internet, skjábúnað.
  • Í ágripum fyrir vinnusmiðjur þarf einnig að tilgreina áætlaðan fjölda þáttakenda í smiðjunni.

Í næsta skrefi skráir þú þig inn í Oxford Abstracts og sendir inn ágrip þaðan (opnar fljótlega):

SENDA INN ÁGRIP

Skapandi leiðir í skóla- og frístundastarfi: Mótum nýja framtíð 

Ég býð ykkur öll hjartanlega velkomin á Menntakviku, stærstu menntaráðstefnu landsins, þar sem kynntar eru nýjustu rannsóknir á sviði menntavísinda og fjallað um brýn viðfangsefni á sviði náms, kennslu, farsældar, velferðar, samfélags og íþrótta og tómstunda.  Ráðstefnan verður nú haldin í Sögu, nýjum glæsilegum húsakynnum Menntavísindasviðs, og markar því mikilvæg tímamót í sögu Háskólans.  

Markmið Menntakviku hefur frá upphafi verið að skapa vettvang fyrir fræða-og fagfólk í skóla- og frístundastarfi til að miðla þekkingu, hugmyndum og starfsháttum sem skila árangri. Á undanförnum árum hafa orðið miklar samfélagslegar breytingar og tækniþróun sem umbreyta um þessar mundir umgjörð náms og kennslu. Segja má að við stöndum á tímamótum og þurfum að spyrja okkur grundvallarspurninga um hvaða hæfni og þekkingu skipti mestu máli að leggja grunn að. Víða um heim er kallað eftir auknum áherslum á verklega og skapandi starfshætti þar sem leitast er við að tengja saman hug og hönd, efla sjálfstæða og skapandi hugsun, hlúa að samskiptahæfni og samkennd, og síðast en ekki síst, gera öllum kleift að njóta sín og vera virkir þátttakendur í samfélaginu.  

Eitt af lykilmarkmiðum flutnings Menntavísindasviðs í Sögu er að stórbæta náms-og kennsluaðstöðu og efla fjölbreytni í námsumhverfi háskólanema. Það er mikill áfangi að taka í notkun þessi glæsilegu kennslurými og má sérstaklega nefna sértæk námsrými fyrir listgreinar, meðal annars leiklistarstofu, myndlistarstofu, textílrými, smíðastofu og tónlistarstofu. Þá verður hreyfirannsóknastofa fyrir íþrótta- og heilsufræði sem er mikið framfaraskref, sérhönnuð rými fyrir kennslu náttúruvísinda og stærðfræði og sérútbúnar leikstofur fyrir kennslu í menntunarfræðum yngri barna. Nú er það okkar að skrifa nýja sögu og móta kennara og fagfólk framtíðarinnar sem kunna að valdefla og mennta ungu kynslóðina, já og okkur öll.  

Opnunarmálstofa Menntakviku fimmtudaginn 2. október setur mikilvægt viðfangsefni í kastljósið, og ber heitið Kennaramenntun í deiglunni. Þar verður tekist á við eftirfarandi spurningar:  

Er sameiginleg sýn á kennaramenntun hér á landi? Hver er uppskriftin að góðum kennara? Hvernig gengur háskólum sem mennta kennara að brúa bil fræða og fags, að undirbúa nýja kennara undir öll þau fjölbreyttu verkefni sem bíða þeirra í starfi?  

Föstudaginn 3. október verða flutt 235 erindi í 57 málstofum og því er úr nægu að velja. Þá verður einnig hægt að fylgjast með málstofum í beinu streymi á ZOOM.  Ég vek sérstaka athygli á því að á laugardeginum 4. október verður boðið upp á um 30 vinnusmiðjur og kynningar kl. 13-15 í Sögu þar sem gefst dýrmætt tækifæri til samvinnu fræða og fagvettvangs. Ráðstefnan er öllum opin og ókeypis. Verið velkomin á Menntakviku 2025! 

Kolbrún Þ. Pálsdóttir 

Forseti Menntavísindasviðs