Dagskrá opnunarmálstofu Menntakviku 2025

Hvenær?
Fimmtudaginn 2. október kl. 14.30– 16.00
Hvar?
SAGA, Hagatorg 1
Stofa S-114 á 1. hæð
Streymi
Hér getur þú fylgst með streymi frá opnunarmálstofunni (kemur inn fljótlega)

Kennaramenntun í deiglunni – Hvar stöndum við? 

Menntavísindasvið Háskóla Íslands býður til opnunarviðburðar Menntakviku 2. október kl. 14:30 – 16:00 í Sögu þar sem staða og framtíð kennaramenntunar á Íslandi verður til umræðu. Áhersla verður á grunnskólastigið sem enn er eina skyldubundna námið á Íslandi. Fundurinn verður í streymi.

Dagskrá  

14.30 – 14.35  Kolbrún Þ. Pálsdóttir, forseti Menntavísindasviðs flytur ávarp.  

14.35 – 14.50 Sameiginleg sýn á kennaramenntun á Íslandi? Birna Svanbjörnsdóttir, dósent við Háskólann og Akureyri og Berglind Gísladóttir, dósent við Menntavísindasvið Háskóla Íslands.  

14.50 – 15:00  Tengsl fræða og starfs í kennaramenntun á Íslandi? Signý Óskarsdóttir, doktorsnemi á Menntavísindasviði. 

15:00 – 15:10 Hver er uppskriftin að góðum kennara og hvaða væntingar hafa skólastjórnendur til kennaramenntunar? Ómar Örn Magnússon, skólastjóri Hagaskóla. 

15:10 – 15:20 Innsýn og reynsla kennaranema. Gunnar Ásgrímsson, kennaranemi og formaður sviðsráðs MVS

15.20 – 15.50 – Pallborðsumræður – Anna Kristín Sigurðardóttir, prófessor við Menntavísindasvið HÍ stýrir umræðum.  

  • Berglind Gísladóttir, dósent við Menntavísindasvið  
  • Birna M. Svanbjörnsdóttir, dósent við Háskólann á Akureyri  
  • Signý Óskarsdóttir, doktorsnemi við Menntavísindasvið  
  • Gunnar Ásgrímsson, kennaranemi og formaður sviðsráðs MVS 
  • Ómar Örn Magnússon, skólastjóri Hagaskóla


15.50 – 16.00 Steinn Jóhannsson, sviðsstjóri skóla- og frístundasviðs flytur lokaávarp.

Meðal efnis eru spurningar um hvort til sé sameiginleg sýn á kennaramenntun, hvernig gangi að brúa bil fræða og starfs í náminu, og hvernig kennaramenntun undirbýr nýliða fyrir starf. Fjölbreytt erindi verða flutt og að þeim loknum verða pallborðsumræður. 

Markmið fundarins eru að:  

  • Efla faglega og samfélagslega umræðu um kennaramenntun.
  • Kanna hvernig kennaramenntun mætir þörfum skólastarfs í dag. 
  • Skapa vettvang fyrir samráð milli fræðasamfélags, skóla og stjórnvalda. 
  • Draga fram áskoranir og tækifæri í þróun kennaranáms.  


Fundurinn er öllum opinn og hvetjum við öll áhugasöm til þátttöku.  

Verið hjartanlega velkomin á opnun Menntakviku í Sögu!

menntakvika.hi.is

menntakvika@hi.is

© 2025 Menntakvika Menntavísindasviðs Háskóla Íslands

Menntakvika Háskóla Íslands

© Allur réttur áskilinn

Skapandi leiðir í skóla- og frístundastarfi: Mótum nýja framtíð 

Ég býð ykkur öll hjartanlega velkomin á Menntakviku, stærstu menntaráðstefnu landsins, þar sem kynntar eru nýjustu rannsóknir á sviði menntavísinda og fjallað um brýn viðfangsefni á sviði náms, kennslu, farsældar, velferðar, samfélags og íþrótta og tómstunda.  Ráðstefnan er nú haldin í fyrsta sinn í Sögu, nýjum glæsilegum húsakynnum Menntavísindasviðs, og markar því mikilvæg tímamót í sögu Háskólans.  

Markmið Menntakviku hefur frá upphafi verið að skapa vettvang fyrir fræða-og fagfólk í skóla- og frístundastarfi til að miðla þekkingu, hugmyndum og starfsháttum sem skila árangri. Á undanförnum árum hafa orðið miklar samfélagslegar breytingar og tækniþróun sem umbreyta um þessar mundir umgjörð náms og kennslu. Segja má að við stöndum á tímamótum og þurfum að spyrja okkur grundvallarspurninga um hvaða hæfni og þekkingu skipti mestu máli að leggja grunn að. Víða um heim er kallað eftir auknum áherslum á verklega og skapandi starfshætti þar sem leitast er við að tengja saman hug og hönd, efla sjálfstæða og skapandi hugsun, hlúa að samskiptahæfni og samkennd, og síðast en ekki síst, gera öllum kleift að njóta sín og vera virkir þátttakendur í samfélaginu.  

Eitt af lykilmarkmiðum flutnings Menntavísindasviðs í Sögu er að stórbæta náms-og kennsluaðstöðu og efla fjölbreytni í námsumhverfi háskólanema. Það er mikill áfangi að taka í notkun þessi glæsilegu kennslurými og má sérstaklega nefna sértæk námsrými fyrir listgreinar, meðal annars leiklistarstofu, myndlistarstofu, textílrými, smíðastofu og tónlistarstofu. Þá verður hreyfirannsóknastofa fyrir íþrótta- og heilsufræði sem er mikið framfaraskref, sérhönnuð rými fyrir kennslu náttúruvísinda og stærðfræði og sérútbúnar leikstofur fyrir kennslu í menntunarfræðum yngri barna. Nú er það okkar að skrifa nýja sögu og móta kennara og fagfólk framtíðarinnar sem kunna að valdefla og mennta ungu kynslóðina, já og okkur öll.  

Opnunarmálstofa Menntakviku fimmtudaginn 2. október setur mikilvægt viðfangsefni í kastljósið, og ber heitið Kennaramenntun í deiglunni. Þar verður tekist á við eftirfarandi spurningar:  

Er sameiginleg sýn á kennaramenntun hér á landi? Hver er uppskriftin að góðum kennara? Hvernig gengur háskólum sem mennta kennara að brúa bil fræða og fags, að undirbúa nýja kennara undir öll þau fjölbreyttu verkefni sem bíða þeirra í starfi?  

Föstudaginn 3. október verða flutt 235 erindi í 57 málstofum og því er úr nægu að velja. Þá verður einnig hægt að fylgjast með málstofum í beinu streymi á ZOOM.  Ég vek sérstaka athygli á því að á laugardeginum 4. október verður boðið upp á um 30 vinnusmiðjur og kynningar kl. 13-15 í Sögu þar sem gefst dýrmætt tækifæri til samvinnu fræða og fagvettvangs. Ráðstefnan er öllum opin og ókeypis. Verið velkomin á Menntakviku 2025! 

Kolbrún Þ. Pálsdóttir 

Forseti Menntavísindasviðs